....الســــلام....


@@ معــــانـــاة أم @@

هو وين ذاك الحلم هو طاب هو مات
" هذا سؤال ام(ن) ذبحني بكاها
صارت شبه حيه وهي بين الاموات
" دامه تقطّع من غيابه رجاها
مريتها صدفه وإهي تنشد ابيات
" ودموعها موج (ن) يصارع رشاها
قالت وانا عيني يجي عشر مرات
" تضم رمش الجفن مما دهاها
يمه خذاني الحزن صوله وجولات
" يمه عنا غيبتك منهو شراها
يمه اشوف الموت روحه وجيات
" كنه خذا مما بروحي خذاها
يمه دخيل الليل ماعشت الاهات
" يابعد عيني ليه نثرت ماها
يمه اضم إصورك واصيح بسكات
" اخاف عيني تنتثر فوق داها
يمه اشوف الوقت سمر(ن) طويلات
"يمه ترى دنياي دارت رحاها
يمه يمر اليوم والناس هيهات
" مافيهم اللي قال ذي وش بلاها
ياما سمعت اصوات .. واصوات .. واصوات
" لاشك الارض احيان تخفي صداها
قلي متى ترجع خذتك المسافات
" واعطيك روح(ن) عل راسك فداها
قلي فدتك الخلق قبل السراوات
" قلي يايمه رد روحي لحشاها
اشتقت لك كلمه تجي بعد كلمات
"اشتقت لك كثر الليال وعناها
اشتقت لك واحلف برب السموات
" اشتقت لك .. اشتقت لك .. يامناها
إيلين فاضت نفسها بعد صيحات
" واقفيت اخايل شكل الارض وحصاها
ام(ن) تحت حذيانها باب جنات
" وابن(ن) تبع نفسه وغاية هواها
كيف الغلط يصلح بعد كووووم غلطات
"ام(ن) وإهي ام(ن) رماها ضناها
ماقول غير الرب يدمح لما فات
" والا الزمن شمس(ن) تمايل سناها


....للشاعر المبدع سلطان الاسيمر...


..وهلا ومرحبا..