هنا جميع قصائد شعراء أهالي القريات

[احمد الشراري]

مرحبا أخواني الأعضاء

الجميع منا يعلم أن القريات تضم نخبه من الشعراء المميزين والذين أثبتوا وجودهم بروعة قصائدهم وهم كثيرون .
والمطلوب منكم وضع قصيده كامله لأي شاعر من شعراء القريات هنا.

وسوف أبدا معكم
بقصيدة حصلت على المركز الأول عبر قناة روتانا خليجيه في برنامج بيت القصيد للشاعر خلف الأسيد
بعنوان { ماللرجا معنى}



الوقت يمضي مركبه عكس الاحلام= والعمر من طرده للاحلام ملي
كم راح عام. وكم بقى للعمر عام= يارغبتي عن باقي العمر حلي
سلمت واستسلمت له راس واقدام= كلي رضخت لواقع الوقت كلي
مير اسمعيني ومسحي دمع الايتام= ماعاد يكسر خاطري غير ضلي
يارغبتي دامك على دين الاسلام= استغفري لله صومي وصلي
توبي تراني تبت عن حلم الايام= مدام حظي بالشقى واقف(ن) لي
وحتى الخيال اللي جمعنا من اعوام= لاّمر فكري قلت خله يولي
صبح الرجا يتبع هوى ليل الاوهام= ماغار من شمس الغلا والتغلي
تاهت به القدره ورى جمع الارقام= ومن تاه فيه الراي ما يستدلي
يارغبتي ياغايتي خاطري شام= عن حاضر(ن) فيه الرجا مستذلي
ماللرجا معنى ولاّ له بعد هام= ضاعت به الهقوه وانا ضعت كلي

الشاعر خلف الأسيد

[احمد الشراري]

هنا قصيده للشاعر المبدع عبدالرزاق الهذيل





مهـمـا يـكـون الشـعـور الـلـي عـلـي بــادي"="لا زلـت انـا الــوارد الـلـي مـاطـوى حبـلـه
عـلـى الـقــراح الـزلالــي طـــال تـــردادي"="اشرب واصدر ظما مدري وش اشرب له
يــا مــن تغاربـتـي غيـابـي وهـــو عـــادي"="بُعـد الرجـل عـن دواعــي ذلــه اهـيـب لــه
ماامشي قبل لا اعـرف الوجهـه بـلا قـادي"=ولا اصــلــي الا وانــــا مـتـقـبــل الـقـبـلــه
مـنـزالـي النـايـفـه عـــن حـــدري الـــوادي"="ورجـلٍ يجـي فـي مسيـل السيـل يــا هبـلـه
أبـعـدت مـالـي غــرض فــي ذل مـقـعـادي"="مــا دام يلـعـب لــي الـذعـذاع والـعــب لـــه
مانـي لعرفـي مــع هــل الـعـرف مـتـرادي"="لاشــك كـبـدي مــن الـلـي شـفــت منـدبـلـه
يـــا لاقـيــة خـيــر هـــاك الـعـلـم لـلـغــادي"="الـلـي عـجـز يـفـرق الشيـحـه مــن الـربـلـه
أمــانــتــك بـلــغــيــه لـــكــــل حـــســــادي"=لا غــارت الـكـدش وكحـيـلان باصطـبـلـه
أنــا أول الـعـشـر مـانــي للـعـشـر حـــادي"=مـالـك ومــال افـتـراض الـجـاهـل الأبـلــه
يمـوت انــا حـاسـدي مــا يـاصـل ابـعـادي"="مـنّـي نـجـوم السـمـا لــو يفـهـم اقــرب لــه
ولابــد مــا الهـايـج المـايـج يـجــي هـــادي"=وكــلٍ يـشـاف المـكـان الـلـي ينـاسـب لـــه
إن مــت مــات الـنـبـي وآبـــاي واجـــدادي"="ومـــا دام لـــي يـــومٍ مـانــي مـيّــتٍ قـبـلــه
للشاعر المبدع عبدالرزاق الهذيل

[احمد الشراري]

وهنا رائعه للشاعر حامد مناور


ما أنت أول اللي عشق قلبي ولا آخرهم =عشقت قبلك كثير وباقي واجد
لكنك أكبر غلا في قلبي وأطهرهم =وداعتك .. تذبح العاشق وهو ساجد
حاولت أبنسى عيونك وأثري أذكرهم =يا غالي في جماله ما يبي شاهد
لو قالوا أخسر جميع البيض بخسرهم =القلب من يمهم يا صاحبي بارد
لو نبشوا داخل أشعاري أبعثرهم .=.عكس البحر عنفوان وداخله راكد
جدايلك يوم رب الكون صورهم =.خلاني أحيا بهم ويموت الحاسد
لعيونك اشعل بحور الشعر واقهرهم .=يحق لك دام ما مثلك ولا واحد
كنتي أول اللي عشق قلبي وآخرهم .=حامد يموت بعيونك يا بعد حامد
الشاعر الرائع حامد مناور

[احمد الشراري]

قصيده للنجم المميز المختلف صالح الشادي


تمدّنا )

والله ، وتمدّنا ..

وصرنا مانعَـْرف الشاي ..

إلا بثلج !! .



وكن الشاي مزروع بشوارعنا ..

وكن الناس تمشي في شوارعنا ..مع الإترنج .. !



يابنت كوني واقعية ..

بي صداع ، يحتاج يتبلسم على جالك ..

ولكن ..

مو بهذا البنج .. !



الغنج ، ساعة وينطفي

وانا اشتهي عمر يشعلل بي رجاف السرج !



زمااااا ن عدّت من هنا .. مراكب الإغريق

وعدّا من هنا ركب المُثنى ..

وعدّوا بيض ..

عدوا زنج .



العصر ( أذن ) ..

والغروب يلوّح بكفه تعال ..

واحتال ..

أضحك على نفسي وأطمنها وأنا أرتج .





ماعاد في نفسي ظما

إلا لبوابة سما ،

أطقها.. وآهج .



النخل إلى منه كبر..

ينسى مواعيد المطر..

والبلبلة والعج !



روحي بتاريخ السحاب..

الله معك..

أنا ب أروح الحج.



()



ياغبية..

كل هالأيام مرت..

وانتي انتي..

تزرعين الثلج في جمري..

– بزعمك بانطفي - !



لا واللطيف اللي لطف

ماكان زرع اللي زرعتي..

كان هم ، وضاع فيني..

دوريه..

وإن لقيتيه اقطفي.



إحلمي ..

لكن وش آخر هالتماهي بالهروب..

أتحضّنك..

لكن أحس إنك معي ..

وإني معك.. بس مختفي ؟!



غلطان من يحكم على التغريد..

ماكل تنهيد يلجلج في الحنايا-

محتفي .



يا حالمة..

ماكل من يسكت حليم ..

ولا كل من زارك وفي.



()



وش رايك تشقي القناع..

وتمسحي لطخ الدهان

وتنزلي من فوق هالمسرح دقيقة ؟



وش رايك تكوني شعاع

ينبعث لآخر خيال بعتمتي مرة..

أو تكوني حقيقة ؟







مايفرّق هالنسا عن بعضهن..

غير إنهن يتشابهن في كل شي-

الا الطريقة ! .



الصخب والعدل الأعمى..

والمدينة والضجر..

نار وحريقة.



مانبي غصن يبس

مانبي وجه عبس

ولا نبي أصلا .. حريقة



إقربي أكثر من أول

طفلك المجنون الأول

جد شيٍ في طريقة.



بس لين الحين والله ..

في ظمااااااه

طايح ولا ابتل ريقه

..........

بللي ريقه .



المختلف الرائع صالح الشادي

[نبع الوفاء]

اهلا وسهلا بك ...

يعطيك ربي العافية ..على هذا لمجهود والطريقه الرااائعه ..

والقصائد المتميزه دعواتي لك ولهم بالتوفيق ...

تسلم يمناك على ماقدمته ...

يحفظك ربي ....

[احمد الشراري]

هنا قصيده جديده للشاعر الرائع محمد الورده بمناسبة صعود نادي المسيره للمتاز .



مسا الضحكة على وجيه الحضور بفرحة الأنجاز =مسا لعيـون جمهورٍ تعشق الفـوز مسروره
مسا أجمل من الزخرف على سجاد من شــيراز =مسا أطيـب من العـود النفيس بقلب بخوره
سلامي للفـريق اللي صعـد لمعـانق الممـتاز =سلامٍ صادقٍ من صادقٍ .. ما يوصف شعوره
وأبـارك للرئيس اللي على مجد البطوله حـاز =قبل لا أبـارك لأعضـاء هالنادي وجمهوره
وأبـارك للذي غصـبٍ عليه .. لديرته ينحـاز = ولا ننسى جهـود اللي رموا بالسـلة الكورة
وبهدي فرحة الليـله لشخصٍ بالوفـا يمتـاز = لابـو ملفي حفظـه الله بغيـابه وبحضوره
أشوف النادي الصوره .. وأهالي ديرتي برواز =ألا يا حي هالبرواز .. ألا يا حي هالصـورة
محـبه في تكاتفهم .. هدفهم من زمان أحـراز = لنا مجـدٍ ونفخـر به .. يعم بكل معمـوره
جهود رجـال جبارة .. عسير الظرف له تجتاز = وفـا وأخـلاص للنادي .. وكلاً يشكر لـدوره
بلوحات الشرف .. نكتب أساميهم بدون إيجـاز = ولا يكفي بلوحات الشـرف بالقلب محفـوره
ترى لو ينخفض سهم المكيرش والخزف والغاز =بقى سهم (( المسيرة )) مرتفع بعيون جمهوره
وأبارك للرئيس اللي بعهده .. سجـل الأنجـاز =قبل لا أبـارك لأصغر مشجع .. حـافظٍ دوره
مسا الفرحة مسا الممتاز والأنجـاز والأعجـاز =مسا أطـهر من الأرض القفر لا جات ممطورة


الشاعر محمد مدان الورده

[مشعل ك ق س]

هلا بك وبأهل القريات معك




الكل حبايبنا




تسلم يمينك




وصح لسانك

[(( كبرياء مجروحه ))]

ماااااااااااااااروع ماكتبت!!

الله يعطيك العافيه اخوي احمد......

تحياتي لك................

[فتى حصيده]

عــن قريــب ترقــبووووا قصـآئـد الشـآعر محمد مشهـور الرويلي
وتـقبلووووووووو تحياتيـ،،
************

[احمد الشراري]

اهلا وسهلا بك ...

يعطيك ربي العافية ..على هذا لمجهود والطريقه الرااائعه ..

والقصائد المتميزه دعواتي لك ولهم بالتوفيق ...

تسلم يمناك على ماقدمته ...

يحفظك ربي ....


نبع الوفاء


الله يعافيك

واسعدني حضورك .